الترجمة الأردية

ہم سے علی بن عبداللہ نے بیان کیا، کہا ہم سے سفیان نے بیان کیا، ان سے یزید بن خصیفہ نے، ان سے بسر بن سعید نے اور ان سے حضرت ابوسعید خدری رضی اللہ تعالیٰ عنہ نے بیان کیا کہ میں انصار کی ایک مجلس میں بیٹھا ہوا تھا کہ حضرت ابوموسیٰ رضی اللہ تعالیٰ عنہ ایسے آئے گویا ڈرے ہوئے تھے اور فرمایا کہ میں نے حضرت عمر رضی اللہ تعالیٰ عنہ سے تین مرتبہ اجازت مانگی لیکن مجھے اجازت نہیں ملی تو میں واپس آ گیا۔ حضرت عمر رضی اللہ تعالیٰ عنہ نے پوچھا تمہیں کس چیز نے روکا؟ میں نے کہا میں نے تین مرتبہ اجازت مانگی لیکن مجھے اجازت نہیں ملی تو میں واپس آ گیا، کیونکہ رسول اللہ صلی اللہ تعالیٰ علیہ وآلہ وسلم نے ارشاد فرمایا ہے کہ جب تم میں سے کوئی تین مرتبہ اجازت مانگے اور اسے اجازت نہ ملے تو واپس چلا جائے۔ حضرت عمر رضی اللہ تعالیٰ عنہ نے فرمایا واللہ تمہیں اس پر گواہ لانا ہوگا۔ تم میں سے کسی نے نبی کریم صلی اللہ تعالیٰ علیہ وآلہ وسلم سے یہ سنا ہے؟ حضرت ابی بن کعب رضی اللہ تعالیٰ عنہ نے فرمایا واللہ تمہارے ساتھ سب سے چھوٹا ہی جائے گا۔ میں سب سے چھوٹا تھا، پس میں ان کے ساتھ گیا اور حضرت عمر رضی اللہ تعالیٰ عنہ کو خبر دی کہ نبی کریم صلی اللہ تعالیٰ علیہ وآلہ وسلم نے یہ فرمایا ہے۔ ابن مبارک نے بیان کیا، مجھے ابن عیینہ نے خبر دی، مجھ سے یزید نے بیان کیا بسر سے، میں نے حضرت ابوسعید سے اسی طرح سنا۔