الترجمة الأردية

ہم سے محمد بن علاء ابوکریب نے بیان کیا، انہوں نے کہا ہمیں ابواسامہ نے برید سے خبر دی، انہوں نے حضرت ابوبردہ سے، انہوں نے حضرت ابوموسیٰ اشعری رضی اللہ تعالیٰ عنہ سے، آپ نے فرمایا: میں اور میرے وہ ساتھی جو کشتی میں (حبشہ سے) آئے تھے "بقیع بطحان" میں ٹھہرے ہوئے تھے اور نبی کریم صلی اللہ تعالیٰ علیہ وآلہ وسلم مدینہ منورہ میں تشریف رکھتے تھے۔ ہم میں سے ایک گروہ باری باری ہر رات عشاء کی نماز میں آپ صلی اللہ تعالیٰ علیہ وآلہ وسلم کی خدمت میں حاضر ہوا کرتا۔ ایک مرتبہ میں اور میرے ساتھی آپ صلی اللہ تعالیٰ علیہ وآلہ وسلم کی خدمت میں حاضر ہوئے۔ آپ صلی اللہ تعالیٰ علیہ وآلہ وسلم کسی کام میں مشغول تھے جس کی وجہ سے نماز میں اتنی تاخیر ہوئی کہ قریب آدھی رات گزر گئی۔ پھر نبی کریم صلی اللہ تعالیٰ علیہ وآلہ وسلم تشریف لائے اور نماز پڑھائی۔ نماز سے فارغ ہو کر حاضرین سے ارشاد فرمایا: "ٹھہرو اور خوشخبری سنو! یہ اللہ تعالیٰ کی نعمت ہے تم پر کہ تمہارے سوا اس وقت دنیا میں کوئی بھی نماز نہیں پڑھتا" — یا فرمایا: "تمہارے سوا اس وقت کسی نے نماز نہیں پڑھی۔" (راوی کو یقین نہیں کہ آپ صلی اللہ تعالیٰ علیہ وآلہ وسلم نے ان دو جملوں میں سے کون سا ارشاد فرمایا۔) حضرت ابوموسیٰ رضی اللہ تعالیٰ عنہ نے فرمایا: ہم رسول اللہ صلی اللہ تعالیٰ علیہ وآلہ وسلم سے یہ سن کر بہت خوش ہو کر واپس آئے۔