الترجمة الأردية

ہم سے مسدد بن مسرہد نے بیان کیا، انہوں نے کہا ہم سے یحییٰ بن سعید قطان نے اعمش سے بیان کیا، اعمش نے کہا مجھ سے شقیق بن مسلمہ نے بیان کیا، شقیق نے کہا میں نے حضرت حذیفہ بن یمان رضی اللہ تعالیٰ عنہ سے سنا، آپ نے فرمایا: ہم حضرت عمر فاروق رضی اللہ تعالیٰ عنہ کی خدمت میں بیٹھے ہوئے تھے۔ آپ نے فرمایا: تم میں سے کسی کو فتنے کے بارے میں رسول اللہ صلی اللہ تعالیٰ علیہ وآلہ وسلم کا ارشاد یاد ہے؟ میں نے عرض کیا: مجھے یاد ہے، بعینہ جیسے آپ صلی اللہ تعالیٰ علیہ وآلہ وسلم نے ارشاد فرمایا تھا۔ حضرت عمر رضی اللہ تعالیٰ عنہ نے فرمایا: تم اس معاملے میں بے باک ہو! میں نے عرض کیا: "انسان کے گھر والوں، مال، اولاد اور پڑوسی کا فتنہ — نماز، روزہ، صدقہ اور امر بالمعروف و نہی عن المنکر اس کا کفارہ بن جاتے ہیں۔" حضرت عمر رضی اللہ تعالیٰ عنہ نے فرمایا: میں اس فتنے کے بارے میں نہیں پوچھ رہا، بلکہ اس فتنے کے بارے میں جو سمندر کی طرح موجیں مارتا ہوا آئے گا۔ میں نے عرض کیا: یا امیر المؤمنین! آپ کو اس سے کوئی خوف نہیں، کیونکہ آپ کے اور اس کے درمیان ایک بند دروازہ ہے۔ پوچھا: کیا وہ دروازہ توڑ دیا جائے گا یا کھولا جائے گا؟ میں نے کہا: توڑ دیا جائے گا۔ حضرت عمر رضی اللہ تعالیٰ عنہ نے فرمایا: پھر تو وہ کبھی بند نہیں ہو سکے گا۔ شقیق نے کہا: ہم نے حضرت حذیفہ رضی اللہ تعالیٰ عنہ سے پوچھا کہ کیا حضرت عمر رضی اللہ تعالیٰ عنہ جانتے تھے کہ وہ دروازہ کون ہے؟ انہوں نے فرمایا: ہاں! جس طرح رات کے بعد دن آنے کا یقین ہے۔ میں نے ان سے ایک حدیث بیان کی تھی جو ہرگز غلط نہیں ہے۔ ہمیں حضرت حذیفہ رضی اللہ تعالیٰ عنہ سے سیدھا پوچھنے میں ڈر لگتا تھا، اس لیے ہم نے مسروق سے کہا (کہ وہ پوچھیں)۔ انہوں نے دریافت کیا تو حضرت حذیفہ رضی اللہ تعالیٰ عنہ نے بتایا: وہ دروازہ خود حضرت عمر (رضی اللہ تعالیٰ عنہ) تھے۔