الترجمة الأردية

ہم سے عبداللہ نے بیان کیا، انہوں نے کہا ہم سے سلیمان بن عبدالرحمٰن اور موسیٰ بن ہارون نے بیان کیا، انہوں نے کہا کہ ہم سے ولید بن مسلم نے بیان کیا، کہا ہم سے عبداللہ بن علاء بن حضرت زبیر نے بیان کیا، کہا کہ مجھ سے بسر بن عبداللہ نے بیان کیا، کہا کہ مجھ سے ابوادریس خولانی نے بیان کیا، کہا کہ میں نے ابودرداء رضی اللہ تعالیٰ عنہ سے سنا، انہوں نے بیان کیا کہ حضرت ابوبکر اور عمر رضی اللہ تعالیٰ عنہما کے درمیان کچھ بحث سی ہو گئی تھی۔ عمر رضی اللہ تعالیٰ عنہ حضرت ابوبکر رضی اللہ تعالیٰ عنہ پر غصہ ہو گئے اور ان کے پاس سے آنے لگے۔ حضرت ابوبکر رضی اللہ تعالیٰ عنہ بھی ان کے پیچھے پیچھے ہو گئے، معافی مانگتے ہوئے۔ لیکن عمر رضی اللہ تعالیٰ عنہ نے انہیں معاف نہیں کیا اور ( گھر پہنچ کر ) اندر سے دروازہ بند کر لیا۔ اب حضرت ابوبکر رضی اللہ تعالیٰ عنہ رسول اللہ صلی اللہ تعالیٰ علیہ وآلہ وسلم کی خدمت میں حاضر ہوئے۔ ابودرداء رضی اللہ تعالیٰ عنہ نے بیان کیا کہ ہم لوگ اس وقت نبی کریم صلی اللہ تعالیٰ علیہ وآلہ وسلم کی خدمت میں حاضر تھے۔ نبی کریم صلی اللہ تعالیٰ علیہ وآلہ وسلم نے ارشاد فرمایا کہ تمہارے یہ صاحب ( یعنی حضرت ابوبکر رضی اللہ تعالیٰ عنہ ) لڑ آئے ہیں۔ راوی نے بیان کیا کہ عمر رضی اللہ تعالیٰ عنہ بھی اپنے طرز عمل پر نادم ہوئے اور نبی کریم صلی اللہ تعالیٰ علیہ وآلہ وسلم کی طرف چلے اور سلام کر کے آپ صلی اللہ تعالیٰ علیہ وآلہ وسلم کے قریب بیٹھ گئے۔ پھر نبی کریم صلی اللہ تعالیٰ علیہ وآلہ وسلم سے سارا واقعہ بیان کیا۔ ابودرداء رضی اللہ تعالیٰ عنہ نے بیان کیا کہ آپ بہت ناراض ہوئے۔ ادھر حضرت ابوبکر رضی اللہ تعالیٰ عنہ باربار یہ عرض کرتے کہ یا رسول اللہ! واقعی میری ہی زیادتی تھی۔ پھر نبی کریم صلی اللہ تعالیٰ علیہ وآلہ وسلم نے ارشاد فرمایا کہ کیا تم لوگ مجھے میرے ساتھی سے جدا کرنا چاہتے ہو؟ کیا تم لوگ میرے ساتھی کو مجھ سے جدا کرنا چاہتے ہو؟ جب میں نے کہا تھا کہ اے انسانو! بیشک میں اللہ کا رسول ہوں، تم سب کی طرف، تو تم لوگوں نے کہا کہ تم جھوٹ بولتے ہو، اس وقت حضرت ابوبکر نے کہا تھا کہ آپ سچے ہیں۔ ابوعبداللہ نے کہا «غامر» کے معنی حدیث میں یہ ہے کہ حضرت ابوبکر رضی اللہ تعالیٰ عنہ نے بھلائی میں سبقت کی ہے۔