الترجمة الأردية

ہم سے علی بن عبداللہ مدینی نے بیان کیا، انہوں نے کہا ہم سے سفیان بن عیینہ نے یحییٰ بن سعید انصاری سے بیان کیا، انہوں نے عمرہ بنت عبدالرحمٰن سے، انہوں نے حضرت اُمّ المؤمنین عائشہ صدیقہ رضی اللہ تعالیٰ عنہا سے روایت کیا۔ فرمایا کہ حضرت بریرہ رضی اللہ تعالیٰ عنہا (لونڈی) ان کے پاس اپنی مکاتبت (آزادی کی رقم) کے سلسلے میں مدد مانگنے آئیں۔ حضرت اُمّ المؤمنین عائشہ رضی اللہ تعالیٰ عنہا نے فرمایا: اگر تم چاہو تو میں تمہارے مالکوں کو رقم دے دوں (اور تمہیں آزاد کرا دوں) اور تمہاری ولاء کا تعلق میرے ساتھ ہو۔ اور بریرہ کے مالکوں نے کہا: اگر آپ چاہیں تو باقی رقم دے دیں — سفیان نے ایک بار یوں کہا: اگر آپ چاہیں تو اسے آزاد کر دیں — اور ولاء کا تعلق ہمارے ساتھ رہے۔ جب رسول اللہ صلی اللہ تعالیٰ علیہ وآلہ وسلم تشریف لائے تو میں نے آپ سے اس بات کا ذکر کیا۔ آپ صلی اللہ تعالیٰ علیہ وآلہ وسلم نے ارشاد فرمایا: اسے خرید کر آزاد کرو کیونکہ ولاء تو اسی کو حاصل ہوتی ہے جو آزاد کرے۔ پھر رسول اللہ صلی اللہ تعالیٰ علیہ وآلہ وسلم منبر پر تشریف لائے — سفیان نے ایک بار یوں کہا: منبر پر چڑھے — اور ارشاد فرمایا: ان لوگوں کا کیا حال ہو گا جو ایسی شرطیں لگاتے ہیں جو کتاب اللہ میں نہیں ہیں۔ جو کوئی ایسی شرط لگائے جو کتاب اللہ میں نہیں تو اس کی کوئی حیثیت نہیں، خواہ وہ سو مرتبہ شرط لگائے۔ اس حدیث کو مالک نے بھی یحییٰ سے عمرہ کے واسطے سے بریرہ سے روایت کیا ہے، لیکن انہوں نے منبر پر چڑھنے کا ذکر نہیں کیا۔