الترجمة الأردية

ہم سے آدم بن ابی ایاس نے بیان کیا، کہا ہم سے شعبہ نے بیان کیا، کہا ہم سے حکم بن عیینہ نے ذر بن عبداللہ سے بیان کیا، وہ سعید بن عبدالرحمٰن بن ابزیٰ سے، وہ اپنے والد سے روایت کرتے ہیں کہ ایک شخص حضرت عمر بن خطاب رضی اللہ تعالیٰ عنہ کے پاس آیا اور عرض کیا مجھے غسل کی ضرورت ہو گئی ہے اور پانی نہیں ملتا (تو میں کیا کروں)؟ اس پر حضرت عمار بن یاسر رضی اللہ تعالیٰ عنہما نے حضرت عمر بن خطاب رضی اللہ تعالیٰ عنہ سے فرمایا کیا آپ کو یاد نہیں جب ہم دونوں ایک سفر میں تھے، ہم دونوں جنبی ہو گئے۔ آپ نے تو نماز نہیں پڑھی لیکن میں نے زمین پر لوٹ پوٹ لیا اور نماز پڑھ لی۔ پھر میں نے نبی کریم صلی اللہ تعالیٰ علیہ وآلہ وسلم سے اس کا ذکر کیا تو آپ صلی اللہ تعالیٰ علیہ وآلہ وسلم نے ارشاد فرمایا تمہیں بس اتنا ہی کافی تھا اور آپ صلی اللہ تعالیٰ علیہ وآلہ وسلم نے اپنی دونوں ہتھیلیاں زمین پر ماریں پھر ان میں پھونکا پھر ان سے اپنے چہرۂ مبارک اور دونوں ہتھیلیوں کا مسح فرمایا۔