الترجمة الأردية

مجھ سے اسحاق بن نصر نے بیان کیا، کہا ہم سے محمد بن عبید نے بیان کیا، کہا ہم سے ابوحیان نے بیان کیا، ان سے ابوزرعہ نے اور ان سے حضرت ابوہریرہ رضی اللہ تعالیٰ عنہ نے بیان کیا کہ ہم نبی کریم صلی اللہ تعالیٰ علیہ وآلہ وسلم کے ساتھ ایک دعوت میں تھے۔ آپ صلی اللہ تعالیٰ علیہ وآلہ وسلم کی خدمت میں دستی کا گوشت پیش کیا گیا جو آپ کو بہت مرغوب تھا۔ آپ نے اس میں سے ایک لقمہ نوش فرمایا اور ارشاد فرمایا "قیامت کے دن میں تمام لوگوں کا سردار ہوں گا۔ تمہیں معلوم ہے اللہ تعالیٰ تمام اولین و آخرین کو ایک چٹیل میدان میں جمع فرمائے گا جہاں دیکھنے والا سب کو دیکھ سکے گا اور پکارنے والے کی آواز سب کو سنائی دے گی اور سورج بالکل قریب ہو جائے گا۔ بعض لوگ کہیں گے: دیکھتے نہیں ہم کس حال میں ہیں اور مصیبت کس حد تک پہنچ چکی ہے؟ کیوں نہ کسی ایسے شخص کی تلاش کی جائے جو اللہ تعالیٰ کی بارگاہ میں ہماری سفارش کرے۔ بعض لوگ کہیں گے: اپنے جدِ امجد حضرت آدم علیہ السلام کے پاس جاؤ۔ چنانچہ لوگ ان کی خدمت میں حاضر ہوں گے اور عرض کریں گے: اے آدم! آپ ابوالبشر ہیں، اللہ تعالیٰ نے آپ کو اپنے دستِ قدرت سے پیدا فرمایا، اپنی روح آپ میں پھونکی، فرشتوں کو حکم دیا تو انہوں نے آپ کو سجدہ کیا اور آپ کو جنت میں رکھا۔ آپ ہمارے رب کی بارگاہ میں ہماری شفاعت فرمائیں، آپ دیکھ رہے ہیں ہم کس حال میں ہیں۔ وہ فرمائیں گے: میرا رب آج اتنا غضبناک ہے جتنا نہ اس سے پہلے کبھی ہوا اور نہ اس کے بعد کبھی ہو گا، اور اس نے مجھے درخت سے منع فرمایا تھا لیکن میں نے کوتاہی کی۔ نفسی نفسی! تم کسی اور کے پاس جاؤ، حضرت نوح علیہ السلام کے پاس جاؤ۔ لوگ حضرت نوح علیہ السلام کی خدمت میں حاضر ہوں گے اور عرض کریں گے: اے نوح! آپ روئے زمین پر سب سے پہلے رسول ہیں اور اللہ تعالیٰ نے آپ کا نام عبدِ شکور رکھا ہے، آپ دیکھ رہے ہیں ہم کس حال میں ہیں، آپ ہمارے رب کی بارگاہ میں ہماری شفاعت فرمائیں۔ وہ فرمائیں گے: میرا رب آج اتنا غضبناک ہے جتنا نہ اس سے پہلے کبھی ہوا اور نہ اس کے بعد کبھی ہو گا۔ نفسی نفسی! تم نبی (آخر الزمان صلی اللہ تعالیٰ علیہ وآلہ وسلم) کے پاس جاؤ۔ چنانچہ لوگ میرے پاس آئیں گے اور میں عرش کے نیچے سجدے میں گر پڑوں گا۔ پھر ارشاد ہو گا: اے محمد! سر اٹھاؤ اور شفاعت کرو، تمہاری شفاعت قبول کی جائے گی، مانگو تمہیں عطا کیا جائے گا۔" محمد بن عبید نے کہا کہ باقی حدیث مجھے یاد نہ رہی۔