الترجمة الأردية

حضرت ابی بن کعب رضی اللہ تعالیٰ عنہ سے روایت ہے، انہوں نے فرمایا: مجھے سو دینار کی ایک تھیلی (راستے میں پڑی ہوئی) ملی۔ میں اسے نبی کریم صلی اللہ تعالیٰ علیہ وآلہ وسلم کی خدمت میں لایا۔ آپ صلی اللہ تعالیٰ علیہ وآلہ وسلم نے ارشاد فرمایا: ایک سال تک اس کا اعلان کرتے رہو۔ میں نے ایک سال تک اعلان کیا لیکن کوئی پہچاننے والا نہ ملا۔ پھر میں دوبارہ حاضر ہوا تو آپ صلی اللہ تعالیٰ علیہ وآلہ وسلم نے ارشاد فرمایا: ایک سال اور اعلان کرو۔ میں نے پھر اعلان کیا مگر کوئی نہ ملا۔ تیسری مرتبہ حاضر ہوا تو آپ صلی اللہ تعالیٰ علیہ وآلہ وسلم نے ارشاد فرمایا: اس کے برتن، تعداد اور بندھن کو یاد رکھو۔ اگر اس کا مالک آ جائے (تو واپس کر دو)، ورنہ اسے اپنے استعمال میں لاؤ۔ چنانچہ میں نے اپنی ضرورت میں خرچ کیا۔ (شعبہ نے بیان کیا کہ) پھر مکہ مکرمہ میں (سلمہ سے) ملاقات ہوئی تو انہوں نے کہا: مجھے معلوم نہیں کہ (ابی بن کعب رضی اللہ تعالیٰ عنہ نے) تین سال اعلان کرنے کا ذکر کیا تھا یا ایک سال کا۔