الترجمة الأردية

ہم سے محمد بن بشار نے بیان کیا، کہا کہ مجھ سے حضرت ابوبکر حنفی نے بیان کیا، کہا کہ ہم سے افلح بن حمید نے بیان کیا، کہا کہ میں نے قاسم بن محمد سے سنا، ان سے حضرت اُمّ المؤمنین عائشہ صدیقہ رضی اللہ تعالیٰ عنہا نے بیان کیا کہ ہم رسول اللہ صلی اللہ تعالیٰ علیہ وآلہ وسلم کے ساتھ حج کے مہینوں، حج کی راتوں اور حج کے زمانے میں نکلے اور سَرِف میں اترے۔ آپ صلی اللہ تعالیٰ علیہ وآلہ وسلم باہر صحابہ کرام کی طرف تشریف لے گئے اور ارشاد فرمایا: تم میں سے جس کے ساتھ قربانی کا جانور نہ ہو اور وہ چاہے کہ اپنے احرام کو صرف عمرہ کا بنا لے تو ایسا کر لے، لیکن جس کے ساتھ قربانی ہو وہ ایسا نہ کرے۔ حضرت اُمّ المؤمنین عائشہ رضی اللہ تعالیٰ عنہا نے فرمایا: صحابہ میں سے کسی نے اس حکم پر عمل کیا اور کسی نے نہیں کیا۔ فرمایا: رسول اللہ صلی اللہ تعالیٰ علیہ وآلہ وسلم اور ان کے بعض صحابہ جو استطاعت و حوصلے والے تھے، ان کے ساتھ قربانی تھی، اس لیے وہ صرف عمرہ نہیں کر سکتے تھے (بلکہ احرام جاری رکھا)۔ حضرت اُمّ المؤمنین عائشہ رضی اللہ تعالیٰ عنہا نے فرمایا: رسول اللہ صلی اللہ تعالیٰ علیہ وآلہ وسلم میرے پاس تشریف لائے تو میں رو رہی تھی۔ آپ صلی اللہ تعالیٰ علیہ وآلہ وسلم نے ارشاد فرمایا: اے بھولی بھالی! کیوں رو رہی ہو؟ میں نے عرض کیا: میں نے آپ کا صحابہ سے فرمان سنا، اب میں عمرہ نہیں کر سکوں گی۔ آپ صلی اللہ تعالیٰ علیہ وآلہ وسلم نے پوچھا: کیا بات ہے؟ میں نے عرض کیا: میں نماز (پڑھنے کے قابل) نہیں ہوں (یعنی حائضہ ہو گئی ہوں)۔ آپ صلی اللہ تعالیٰ علیہ وآلہ وسلم نے ارشاد فرمایا: کوئی حرج نہیں، تم بھی آدم (علیہ السلام) کی بیٹیوں میں سے ایک عورت ہو، اللہ نے تمہارے لیے بھی وہی مقدر فرمایا ہے جو تمام عورتوں کے لیے فرمایا ہے۔ اپنے حج پر قائم رہو، اللہ تعالیٰ عنقریب تمہیں عمرہ عطا فرما دے گا۔ حضرت اُمّ المؤمنین عائشہ رضی اللہ تعالیٰ عنہا نے فرمایا: ہم حج کے لیے نکلے، جب منیٰ پہنچے تو میں پاک ہو گئی، پھر منیٰ سے نکل کر میں نے بیت اللہ کا طوافِ زیارت کیا۔ فرمایا: پھر آخری روانگی میں نبی کریم صلی اللہ تعالیٰ علیہ وآلہ وسلم کے ساتھ نکلیں یہاں تک کہ آپ صلی اللہ تعالیٰ علیہ وآلہ وسلم محصّب میں اترے اور ہم بھی وہیں اترے۔ آپ صلی اللہ تعالیٰ علیہ وآلہ وسلم نے حضرت عبدالرحمٰن بن ابی بکر رضی اللہ تعالیٰ عنہ کو بلا کر ارشاد فرمایا: اپنی بہن کو حرم سے باہر لے جاؤ، وہ عمرہ کا احرام باندھے، پھر عمرہ سے فارغ ہو کر تم دونوں یہاں آ جاؤ، میں تمہارا انتظار کروں گا۔ حضرت اُمّ المؤمنین عائشہ رضی اللہ تعالیٰ عنہا نے فرمایا: ہم نکلے، جب میں (عمرہ سے) فارغ ہوئی اور طواف سے فراغت ہوئی تو سحری کے وقت آپ صلی اللہ تعالیٰ علیہ وآلہ وسلم کی بارگاہ میں حاضر ہوئی۔ آپ صلی اللہ تعالیٰ علیہ وآلہ وسلم نے پوچھا: فارغ ہو گئیں؟ میں نے عرض کیا: جی ہاں۔ تب آپ صلی اللہ تعالیٰ علیہ وآلہ وسلم نے صحابہ کرام میں روانگی کا اعلان فرمایا اور سب لوگ مدینہ منورہ کی طرف روانہ ہو گئے۔