الترجمة الأردية

ہم سے عیاش بن ولید نے بیان کیا، کہا ہم سے عبدالاعلیٰ نے بیان کیا، کہا ہم سے سعید نے بیان کیا، ان سے قتادہ نے اور ان سے حضرت انس بن مالک رضی اللہ تعالیٰ عنہ نے روایت کیا کہ رسول اللہ صلی اللہ تعالیٰ علیہ وآلہ وسلم نے ارشاد فرمایا: بندہ جب اپنی قبر میں رکھا جاتا ہے اور اس کے ساتھی (جنازے والے) واپس جاتے ہیں — وہ ابھی ان کے جوتوں کی آہٹ سن رہا ہوتا ہے — تو دو فرشتے اس کے پاس آتے ہیں، اسے بٹھاتے ہیں اور پوچھتے ہیں: اس شخص یعنی محمد (صلی اللہ تعالیٰ علیہ وآلہ وسلم) کے بارے میں تو کیا اعتقاد رکھتا تھا؟ مومن تو کہے گا: میں گواہی دیتا ہوں کہ وہ اللہ کے بندے اور اس کے رسول ہیں۔ اس پر کہا جائے گا: اپنا جہنم کا ٹھکانا دیکھ — اللہ تعالیٰ نے اس کے بدلے تیرے لیے جنت کا ٹھکانا عطا فرمایا ہے، اسے دونوں مقامات دکھائے جائیں گے۔ قتادہ نے فرمایا: ہمیں بتایا گیا ہے کہ اس کی قبر کشادہ کر دی جاتی ہے۔ پھر قتادہ حضرت انس رضی اللہ تعالیٰ عنہ کی حدیث کی طرف لوٹے اور فرمایا: (آپ صلی اللہ تعالیٰ علیہ وآلہ وسلم نے ارشاد فرمایا:) اور منافق یا کافر سے جب پوچھا جائے گا کہ اس شخص کے بارے میں تو کیا کہتا تھا؟ تو وہ کہے گا: مجھے معلوم نہیں، میں بھی وہی کہتا تھا جو لوگ کہتے تھے۔ اس پر کہا جائے گا: نہ تو نے جانا اور نہ (نیک لوگوں کی) پیروی کی۔ پھر اسے لوہے کے ہتھوڑوں سے ایک ضرب لگائی جائے گی اور وہ ایسی چیخ مارے گا جسے انسان و جن کے سوا اردگرد کی ساری مخلوق سنے گی۔