الترجمة الأردية

ہم سے حضرت عثمان بن ابی شیبہ نے بیان کیا، کہا مجھ سے جریر نے بیان کیا، ان سے منصور بن معتمر نے، ان سے سعد بن عبیدہ نے، ان سے ابوعبدالرحمٰن عبداللہ بن حبیب نے اور ان سے حضرت علی المرتضیٰ کرّم اللہ تعالیٰ وجہہ الکریم نے روایت کیا کہ ہم بقیع الغرقد میں ایک جنازے کے ہمراہ تھے۔ اتنے میں نبی کریم صلی اللہ تعالیٰ علیہ وآلہ وسلم تشریف لائے اور تشریف فرما ہوئے۔ ہم بھی آپ صلی اللہ تعالیٰ علیہ وآلہ وسلم کے گرد بیٹھ گئے۔ آپ صلی اللہ تعالیٰ علیہ وآلہ وسلم کے دست مبارک میں ایک چھڑی تھی۔ آپ صلی اللہ تعالیٰ علیہ وآلہ وسلم نے سر مبارک جھکا کر چھڑی سے زمین کریدنا شروع فرمایا۔ پھر ارشاد فرمایا: تم میں کوئی ایسا نہیں ہے، کوئی جان ایسی نہیں پیدا ہوئی جس کا ٹھکانا جنت اور دوزخ میں نہ لکھا جا چکا ہو اور یہ بھی لکھ دیا گیا ہو کہ وہ نیک بخت ہے یا بدبخت۔ ایک صحابی نے عرض کیا: یا رسول اللہ (صلی اللہ تعالیٰ علیہ وآلہ وسلم)! کیا ہم اپنی تقدیر پر بھروسہ نہ کر لیں اور عمل چھوڑ دیں؟ کیونکہ ہم میں سے جو نیک بخت ہے وہ نیک بختوں کے عمل کی طرف ہی لوٹے گا، اور جو بدبخت ہے وہ بدبختوں کے عمل کی طرف جائے گا۔ آپ صلی اللہ تعالیٰ علیہ وآلہ وسلم نے ارشاد فرمایا: نیک بختوں کے لیے نیکی کے کام آسان کر دیے جاتے ہیں اور بدبختوں کے لیے بدی کے کام آسان کر دیے جاتے ہیں۔ پھر آپ صلی اللہ تعالیٰ علیہ وآلہ وسلم نے آیت کریمہ تلاوت فرمائی: «فأما من أعطى واتقى» (پس جس نے (اللہ کی راہ میں) دیا اور تقویٰ اختیار کیا)۔ (سورۃ اللیل)