الترجمة الأردية

ہم سے بشر بن محمد نے بیان کیا، ہمیں عبداللہ بن مبارک رحمۃ اللہ تعالیٰ علیہ نے خبر دی، انہوں نے فرمایا مجھے معمر اور یونس نے زہری سے خبر دی، انہوں نے فرمایا مجھے ابو سلمہ نے خبر دی کہ نبی کریم صلی اللہ تعالیٰ علیہ وآلہ وسلم کی زوجۂ مطہرہ حضرت اُمّ المؤمنین عائشہ صدیقہ رضی اللہ تعالیٰ عنہا نے ان سے بیان فرمایا: حضرت ابوبکر صدیق رضی اللہ تعالیٰ عنہ اپنے گھوڑے پر سوار ہو کر سنح (مدینے سے باہر ایک بستی) سے تشریف لائے۔ اتر کر مسجد میں داخل ہوئے، کسی سے بات نہیں کی، سیدھے حضرت اُمّ المؤمنین عائشہ رضی اللہ تعالیٰ عنہا کے حجرے میں تشریف لائے اور نبی کریم صلی اللہ تعالیٰ علیہ وآلہ وسلم کی طرف بڑھے۔ آپ صلی اللہ تعالیٰ علیہ وآلہ وسلم کا جسمِ اطہر یمنی دھاری دار چادر سے ڈھکا ہوا تھا۔ انہوں نے چہرۂ انور سے کپڑا ہٹایا، پھر جھکے اور بوسہ دیا اور رونے لگے۔ فرمایا: میرے ماں باپ آپ پر فدا ہوں، اے اللہ کے نبی! اللہ تعالیٰ آپ پر دو موتیں جمع نہیں فرمائے گا۔ جو موت آپ کے لیے مقدر تھی وہ آ چکی۔ ابو سلمہ فرماتے ہیں مجھے حضرت ابن عباس رضی اللہ تعالیٰ عنہما نے خبر دی کہ حضرت ابوبکر رضی اللہ تعالیٰ عنہ (حجرے سے) باہر نکلے اور حضرت عمر رضی اللہ تعالیٰ عنہ لوگوں سے خطاب فرما رہے تھے۔ حضرت ابوبکر رضی اللہ تعالیٰ عنہ نے فرمایا: بیٹھ جائیے۔ لیکن حضرت عمر رضی اللہ تعالیٰ عنہ نہ مانے۔ پھر فرمایا: بیٹھ جائیے۔ لیکن وہ نہ بیٹھے۔ پھر حضرت ابوبکر رضی اللہ تعالیٰ عنہ نے کلمۂ شہادت پڑھا تو لوگ حضرت عمر رضی اللہ تعالیٰ عنہ کو چھوڑ کر حضرت ابوبکر رضی اللہ تعالیٰ عنہ کی طرف متوجہ ہو گئے۔ حضرت ابوبکر رضی اللہ تعالیٰ عنہ نے فرمایا: اما بعد! تم میں سے جو محمد صلی اللہ تعالیٰ علیہ وآلہ وسلم کی عبادت کرتا تھا تو بے شک محمد صلی اللہ تعالیٰ علیہ وآلہ وسلم نے وفات پائی، اور جو اللہ کی عبادت کرتا تھا تو بے شک اللہ زندہ ہے، اسے کبھی موت نہیں آتی۔ اللہ تعالیٰ نے فرمایا: «وَمَا مُحَمَّدٌ إِلَّا رَسُولٌ» ... «الشَّاكِرِينَ» (اور محمد صرف ایک رسول ہیں)۔ واللہ! گویا لوگوں کو معلوم ہی نہ تھا کہ اللہ تعالیٰ نے یہ آیت نازل فرمائی ہے، یہاں تک کہ حضرت ابوبکر رضی اللہ تعالیٰ عنہ نے اس کی تلاوت فرمائی اور لوگوں نے ان سے سن کر اسے یاد کر لیا اور کوئی شخص نہ تھا مگر وہ اسی آیت کی تلاوت کر رہا تھا۔