الترجمة الأردية

ہم سے محمد بن مقاتل نے بیان کیا، ہمیں عبداللہ بن مبارک رحمۃ اللہ تعالیٰ علیہ نے خبر دی، ہمیں یونس نے خبر دی، ان سے زہری نے، ان سے عروہ نے فرمایا کہ حضرت اُمّ المؤمنین عائشہ صدیقہ رضی اللہ تعالیٰ عنہا نے بتایا کہ جب سورج گرہن لگا تو نبی کریم صلی اللہ تعالیٰ علیہ وآلہ وسلم (نماز کے لیے) کھڑے ہوئے اور ایک لمبی سورت تلاوت فرمائی، پھر لمبا رکوع فرمایا، پھر سر مبارک اٹھایا، پھر دوسری سورت شروع فرمائی، پھر رکوع کیا، رکعت مکمل فرما کر سجدے میں تشریف لے گئے۔ پھر دوسری رکعت میں بھی اسی طرح کیا۔ اس کے بعد ارشاد فرمایا: یہ (سورج اور چاند گرہن) اللہ تعالیٰ کی نشانیوں میں سے دو نشانیاں ہیں۔ جب تم یہ دیکھو تو نماز پڑھو یہاں تک کہ گرہن ختم ہو جائے۔ بے شک میں نے اسی مقام پر وہ سب کچھ دیکھا جس کا مجھ سے وعدہ کیا گیا ہے۔ یہاں تک کہ میں نے دیکھا کہ میں جنت کا ایک خوشہ لینا چاہ رہا تھا، اسی وقت تم نے مجھے آگے بڑھتے دیکھا ہو گا۔ اور میں نے جہنم بھی دیکھی، اس کا بعض حصہ بعض کو کھائے جا رہا تھا، اسی وقت تم نے مجھے پیچھے ہٹتے دیکھا ہو گا۔ اور میں نے اس میں عمرو بن لحیّ کو دیکھا جس نے (عرب میں بتوں کے نام پر) سائبہ جانوروں کو چھوڑنے کی رسم شروع کی تھی۔