الترجمة الأردية

ہم سے عبداللہ بن یوسف تنیسی نے بیان کیا، انہیں امام مالک رحمۃ اللہ تعالیٰ علیہ نے خبر دی، انہیں مخرمہ بن سلیمان نے، انہیں حضرت ابن عباس رضی اللہ تعالیٰ عنہما کے آزاد کردہ غلام کریب نے خبر دی کہ حضرت عبداللہ بن عباس رضی اللہ تعالیٰ عنہما ایک رات حضرت اُمّ المؤمنین میمونہ رضی اللہ تعالیٰ عنہا کے ہاں رات رہے، جو ان کی خالہ تھیں۔ فرماتے ہیں کہ میں تکیے کی چوڑائی میں لیٹ گیا اور رسول اللہ صلی اللہ تعالیٰ علیہ وآلہ وسلم اور آپ کی زوجہ مطہرہ اس کی لمبائی میں لیٹے۔ پھر رسول اللہ صلی اللہ تعالیٰ علیہ وآلہ وسلم سو گئے حتیٰ کہ آدھی رات ہوئی یا اس سے تھوڑی دیر پہلے یا بعد۔ پھر آپ صلی اللہ تعالیٰ علیہ وآلہ وسلم بیدار ہو کر بیٹھ گئے اور اپنے دونوں ہاتھوں سے چہرۂ انور سے نیند کا اثر دور فرمایا۔ پھر سورۃ آل عمران کی آخری دس آیات تلاوت فرمائیں۔ پھر ایک لٹکتی ہوئی مشک کی طرف تشریف لے گئے اور اس سے بہترین وضو فرمایا، پھر نماز میں کھڑے ہو گئے۔ حضرت عبداللہ بن عباس رضی اللہ تعالیٰ عنہما فرماتے ہیں کہ میں بھی اٹھا اور جیسا آپ صلی اللہ تعالیٰ علیہ وآلہ وسلم نے کیا تھا ویسا ہی میں نے بھی کیا، پھر جا کر آپ صلی اللہ تعالیٰ علیہ وآلہ وسلم کے پہلو میں کھڑا ہو گیا۔ رسول اللہ صلی اللہ تعالیٰ علیہ وآلہ وسلم نے اپنا دایاں دستِ مبارک میرے سر پر رکھا اور میرے دائیں کان کو پکڑ کر ملنے لگے۔ پھر آپ صلی اللہ تعالیٰ علیہ وآلہ وسلم نے دو رکعت ادا فرمائیں، پھر دو رکعت، پھر دو رکعت، پھر دو رکعت، پھر دو رکعت، پھر دو رکعت، پھر وتر پڑھے، پھر لیٹ گئے یہاں تک کہ مؤذن آیا تو اٹھے اور دو ہلکی رکعتیں پڑھیں، پھر باہر تشریف لے گئے اور فجر کی نماز ادا فرمائی۔